बिहीबार करिब सात घण्टासम्म अवरुद्ध भएको इन्टरनेट सेवा मध्यरातिबाट सञ्चालनमा आएको छ ।
बिहीबार दिउँसो ४ बजेदेखि इन्टरनेट सेवा अवरुद्ध थियो । सञ्चार तथा सूचना प्रविधि मन्त्रालयको प्रयासपछि गएराति १० बजेपछि सेवा सञ्चालनमा आएको हो ।
अन्तर्राष्ट्रिय ब्यान्डविथ प्रदायकले आपूर्ति सुचारु गरेसँगै नेपालमा इन्टरनेट चल्न थालेको सेवा प्रदायक कम्पनीहरूले बताएका छन् । वर्ल्ड लिंक, भायानेटसहितका इन्टरनेट सेवा प्रदायकहरूले सामाजिक सञ्जालमार्फत इन्टरनेट सेवा पुर्नस्थापित भएको जानकारी गराएका छन् ।
यसअघि प्रमुख इन्टरनेट सेवा प्रदायक (आईएसपी) कम्पनीहरूले विदेशबाट आयात गर्दै आएको व्यान्डविथको आपूर्ति रोकिएपछि इन्टरनेट सेवा अवरुद्ध भएको बताएका थिए ।
नेपालमा प्रमुख इन्टरनेट सेवा प्रदायकले एयरटेल, टाटा, रिलायन्सलगायत कम्पनीलाई आयात गरेको ब्यान्डविथबापतको तीन अर्ब रुपैयाँभन्दा बढी रकम भुक्तानी गर्न बाँकी छ ।
तर, सरकारले कर नतिरेको बताएर नेपालका प्रमुख इन्टरनेट सेवा प्रदायकहरूलाई विदेशी मुद्रा भुक्तानका लागि सिफारिस गर्न रोक लगाएको छ ।
आफू भुक्तानी नपाएपछि अन्तर्राष्ट्रिय ब्यान्डविथ प्रदायकले सेवा रोकिदिएको थियो ।
