रसुवागढी जलविद्युत् आयोजनाको उपकरण जडान सुरु, कहिलेबाट होला विद्युत उत्पादन ?

धादिङ। उत्तरी रसुवामा निर्माणाधीन रसुवागढी जलविद्युत् आयोजनाको उपकरण जडान कार्य सुरु भएको छ।

आयोजनाको अधिकांश संरचना निर्माण सम्पन्न भए पनि कोभिड–१९ संक्रमणका कारण दक्ष प्राविधिक कार्यस्थलमा नआउँदा लामो समयदेखि स्थगन रहेको उपकरण जडान कार्य भर्खरैमात्र सुरु भएको हो।

आयोजनाका प्रमुख सत्यराम ज्याख्वाका अनुसार १११ मेगावाट विद्युत् उत्पादन गर्ने क्षमताको उपकरण जडान गर्न जिम्मा पाएको भारतीय कम्पनी भोइथ इन्डियाले धेरै लामो समयपछि दक्ष जनशक्ति उपलब्ध गराएलगत्तै उपकरणको जडान अगाडि बढेको हो। उपकरण जडान गर्न करिब एक वर्षको समयावधि लाग्ने र सन् २०२२ सम्ममा आयोजनाले विद्युत् उत्पादन गर्ने कार्य तालिका रहेको उनले जानकारी दिए।

सन् २०१३ बाट निर्माण सुरु भएको आयोजनाले विद्युतगृहमा पानी पठाउने ४ हजार १८५ मिटर लामो हेडरेस सुरुङ एवं विद्युतगृह निर्माणको संरचना निर्माण गरिसकेको छ। विद्युतगृहमा पानी लान भोटेकोसीको बाँध बाँध्ने कामसमेत निर्माण सम्पन्न गरी पानी बालुवा थिग्य्राउने भूमिगत डिसेन्डर पोखरी भने निर्माणको चरण अन्तिम चरणमा रहेको जनाइएको छ।

गत साता नेपाल विद्युत् प्राधिकरणका कार्यकारी निर्देशक कुलमान घिसिङको स्थलगत निरीक्षण एवं छिटो कार्य सम्पन्न गर्ने निर्देशनपश्चात उपकरण जडानका लागि भोइथ इन्डियाले दक्ष जनशक्ति उपलब्ध गराएको बताइन्छ। उनले गत साता निर्माणाधीन आयोजनाको निर्माणस्थलबाटै आआफ्नो जिम्माको काम छिटो सम्पन्न गराउन ठेकेदार कम्पनीलाई निर्देशन दिएलगत्तै कोभिडको डरले सुस्ताइरहेका ठेकेदार कम्पनीका जिम्मेवार व्यक्ति पुनः जागरुक भएको आयोजनाका प्राविधिक बताउँछन्।

उपकरण जडानका लागि ४० जनाभन्दा बढी जनशक्तिले दैनिक बिहान ७ बजेदेखि बेलुकी ७ बजेसम्म काम गरिरहेका छन्। आयोजनाको सर्चट्यांक भने भित्री भागबाट निर्माण भइरहेको बताइएको छ।

सम्बन्धित
Leave A Reply

Your email address will not be published.