भदौको अन्तिम सातादेखि चाडपर्व लक्षित बजार अनुगमन गरिने भएको छ । विगतका वर्षभन्दा बढी कडाइका साथ भदौ अन्तिम सातादेखि अनुगमन शुरू गर्ने वाणिज्य तथा आपूर्ति तथा उपभोक्ता संरक्षण विभागले जनाएको छ ।
यस वर्षको चाडपर्व लक्षित बजार अनुगमनमा १० टोली खटाइने विभागका महानिर्देशक राजन पौडेलले बताए । अनुगमन बढी प्रभावकारी र आक्रामक बनाइने उनले बताए ।
‘विभागले बजार अनुगमन गरिरहेकै छ । अब चाडपर्व नजिकिँदै गर्दा यसलाई बढी प्राविधिक जनशक्ति खटाएर कडाइका साथ लागु गर्ने तयारी गरिरहेका छौँ,’ महानिर्देशक पौडेलले भने, ‘विगतका वर्षभन्दा यस वर्ष अलिक आक्रामक रूपमा नै अनुगमन हुन्छ ।’
