अन्तराष्ट्रिय हवाईको भाडा तीन गुणाले बढेको पाइएको छ। नेपालबाट विदेश उडान भर्दै आएका सबै हवाई कम्पनीहरुले तीन गुणासम्म हवाई भाडा बढाएको पाइएको हो।
अन्तराष्ट्रिय उडान भर्दै आएका हवाई कम्पनीहरुले यहि नोभेम्बरदेखि लागू हुनेगरी हवाई भाडा बढाएका हुन्। यसअघि नेपालबाट दुबई जानलाई औषतमा ३२ हजार रुपैयाँ हवाई भाडा रहेकोमा अहिले बढाएर ८२ हजार बनाइएको छ।
यसैगरी नेपालका लागि बैदेशिक रोजगारका लागि गन्तब्य मुलुकका देशहरुमा तीन गुणासम्मले भाडा बढाएपछि नेपाल वैदेशिक रोजगार व्यवसायी संघले समेत नेपाल सरकारको ध्यानाकर्षण गराएको छ। अचानक तीन गुणाले भाडा बढाउँदा बैदेशिक रोजगारीमा जाने नेपालीहरुमाथि ठुलो आर्थिक भार पर्ने भन्दै संघले श्रम मन्त्रालय लगायतका निकायको ध्यानाकार्षण गराएको हो।
अन्तराष्ट्रिय हवाई कम्पनीहरुले भाडा अचाक्ली बढाएकाले नेपाली श्रमिक मारमा पर्ने भन्दै संघले नेपाली कामदारलाई भारतको दील्ली हुँदै गन्तब्य मूलुक जान दिन समेत सरकारसंग आग्रह गरेको छ।
“सिजनमा केहि प्रतिशतले भाडाको दर बढ्नु सामान्य भएपनि अहिले अचाक्ली बढ्नु कालोबजारी नै भएकाले यसलाई रोक्न हामीले श्रम मन्त्रालयको ध्यानाकर्षण गरेका छौं, नागरिक उड्डयनलाई पनि भेटेर कुरा राख्छौं” नेपाल वैदेशिक रोजगार व्यवसायी संघका अध्यक्ष राजेन्द्र भण्डारीले बिजपाटीलाई बताए।
यहि कात्तिक २३ गतेदेखि त्रिभुवन अन्तराष्ट्रिय विमानस्थलको उडान कटौती गरिने भएपछि बिशेषगरि अन्तराष्ट्रिय उडान भर्ने कम्पनीहरुले अन्तराष्ट्रिय हवाई भाडा बढाएका हुन्। यद्दपि आन्तरिक उडान भर्ने हवाई कम्पनीहरुले भने भाडादर विगतकै कायम गरेका छन् र नबढाउने प्रतिबद्दता जनाएका छन्।
नागरिक उड्डयन प्राधिकरणले यहि कात्तिक २३ गतेदेखि दैनिक १० घण्टा विमानस्थल बन्द गर्ने भएपछि करिब ४० प्रतिशत उडान कटौती गरिएका छन्। प्राधिकरणले रातको समय स्तरोन्नतिको काम गर्ने भन्दै आगामी पांच महिनाको लागि बिहान ८ बजेदेखि बेलुका १० बजेसम्म मात्रै हवाई सेवा दिन सकिने भन्दै त्यहिअनुसार तालिका बनाएको छ।
भाडा बढाएको बिषयमा अन्तराष्ट्रिय उडान भर्दै आएका अन्तराष्ट्रिय हवाई उडान कम्पनीहरुको छाता संगठन एयरलायन अपरेटर कमिटि नेपालले आफ्नो आधिकारिक धारणा बाहिर ल्याएको छैन।
