काठमाडौँ । सरकारी ऋणपत्र तथा बण्डहरु अब सार्वजनिक ऋण व्यवस्थापन कार्यालयले नै हेर्ने भएको छ । नेपाल सरकारको ट्रेजरी बिल र विकास ऋणपत्रको बोलकबोल तथा निष्कासन अब ऋण व्यवस्थापन कार्यालयले नै हेर्ने भएको हो ।
सार्वजनिक ऋण व्यवस्थापन ऐन, २०७९ तथा सार्वजनिक ऋण व्यवस्थापन नियमावली, २०८० कार्यान्वयनमा आइसकेकाले नेपाल सरकारको आन्तरिक ऋणसँग सम्बन्धित ऋणपत्र निष्कासन तथा भुक्तानी ऋण व्यवस्थापनका कार्यालयबाटै हुने कार्यालयले जनाएको हो ।
यसअघि यस्तो ऋणपत्र तथा बण्डहरुको निष्कासन तथा व्यवस्थापन केन्द्रीय बैंकमार्फत हुँदै आएको थियो । तथापि, यस्तो कारोबार नेपाल राष्ट्र बैंकसँगको समन्वयमा ऋण सापटी तथा भुक्तानीको कार्य सम्पादन कार्यालयबाट हुने बताइएको छ ।
चैत १९ गतेदेखि ऋणपत्र निष्कासन तथा व्यवस्थापनको जिम्मेवारी दिएको कार्यालयले आजै १३ अर्ब ५ करोड रुपैयाँ बराबरको ऋणपत्र ९ट्रेजरी बिल० बोलकबोल गर्दैछ ।
९१ दिने र १८२ दिने गरी दुई किसिमको ट्रेजरी जारी गर्न लागेको कार्यालयले ९१ दिनका लागि ७ अर्ब ७५ करोड रुपैयाँ र १८२ दिनका लागि ५ अर्ब ३० करोड छुट्टाएको छ । तथापि, उक्त ट्रेजरी नयाँ नभएर पुरानै नवीकरण गर्न लागिएको कार्यालयले जनाएको छ ।
इच्छुक बैंक तथा वित्तीय संस्थाले सोमबार दिउँसो ३ बजेसम्म आवेदन दिन सक्नेछन् । आज ३ बजे बोलकबोल हुने ट्रेजरी बिल भोलि मंगलबार जारी गरिने बैंकले जनाएको छ ।
