काठमाडौं । पछिल्लो १० दिनमा सुनको मूल्य प्रतितोला ७ हजार ६ सय रुपैयाँले बढेको छ । फागुन १७ गतेबाट लगातार बढेको सुनको मूल्यले एकपछि अर्को नयाँ रेकर्ड कायम गर्दै गएको छ ।
गत फागुन १७ गते छापावाला सुनको मूल्य प्रतितोला १ लाख १८ हजार ४ सय रुपैयाँ कायम भएको थियो । त्यस्तै, फागुन १८ गते सुनको मूल्य प्रतितोला ६ सय रुपैयाँले बढेर १ लाख १९ हजार रुपैयाँ कायम भएको थियो ।
नेपाल सुनचाँदी व्यवसायी महासंघका तथ्यांकअनुसार गत फागुन २० गते एकै दिन २ हजार रुपैयाँले १ लाख २१ हजार रुपैयाँ कायम भएको थियो । साथै, फागुन २१ गते पनि मूल्य स्थिर रही सोही मूल्यमा कारोबार भएको थियो । तर, फागुन २२ गते भने विगतमा रेकर्ड कायम गरेको सुनको मूल्य ब्रेक गर्दै नयाँ इतिहास कायम गरेको थियो । फागुन २२ गते सुनको मूल्य प्रतितोला २ हजार रुपैयाँले बढेर १ लाख २३ हजार रुपैयाँ कायम भएको थियो ।
त्यस्तै, फागुन २३ गते पनि सुनको मूल्यले नयाँ रेकर्ड ब्रेक गर्दै १ लाख २३ हजार ५ सय रुपैयाँ कायम भएको तथ्याङ्कले देखाउँछ । फागुन २४ गते सुनको मूल्य पुनः रेकर्ड ब्रेक गर्दै सुनको मूल्य १ लाख २५ हजार रुपैयाँ कायम भएको थियो । फागुन २५ गते भने स्थिर रही सोही मूल्यमा कारोबार भएको थियो ।
लगातार बढेको सुनको मूल्यले आइतबार पनि पुनः नयाँ इतिहास कायम गरेको छ । महासंघअनुसार आइतबार हालसम्मकै बढी मूल्य कायम भएको छ । आइतबार सुनको मूल्य प्रतितोला १ लाख २६ हजार रुपैयाँ कायम भएको छ । आइतबार तेजावी सुनको मूल्य प्रतितोला १ लाख २५ हजार ४ सय रुपैयाँ कायम भएको छ ।
साथै, चाँदीको मूल्य पनि १० दिनको अवधिमा एक सय रुपैयाँले बढेको छ । गत फागुन १७ गते चाँदीको मूल्य प्रतितोला १३ सय ७५ रुपैयाँ कायम भएकोमा आइतबारसम्ममा एक सय रुपैयाँले बढेर १४ सय ७५ रुपैयाँ कायम भएको छ । पछिल्लो समय विश्व बजारमा तेलको मूल्यमा आएको गिरावटसँग भारत र चीन जस्ता उदाउँदा ठूला देशहरुले डलरको सट्टा सुन राख्न थालेपछि पनि सुनको मूल्यमा लगातार वृद्धि भइरहेको छ ।
