भर्चुअल मुद्रा बिट्क्वाइनको भाउ प्रतिगोटा ८० हजार डलरमाथि उक्लिएको छ । आइतबार बिट्क्वाइनको भाउले नयाँ कीर्तिमान बनाएको हो ।
मंगलबार अमेरिकामा भएको राष्ट्रपति निर्वाचनमा पूर्व राष्ट्रपति डोनाल्ड ट्रम्प विजयी भएयता विश्वको सबैभन्दा महँगो क्रिप्टोकरेनसी बिट्क्वाइनको भाउ बुलिश बनेको छ । निर्वाचन लगत्तै ट्रम्पले जित्ने स्पष्ट हुन थालेपछि बिट्क्वाइनको भाउ बढ्न थालेको थियो ।
यो क्रमले सोमबारसम्मै निरन्तरता पाइरहेको छ । आइतबार बिटक्वाइनको भाउ पहिलो पटक ८० हजार डलर माथि उक्लिएको थियो । यो समाचार तयार पार्दाखेरि नेपाली समयअनुसार सोमबार बिहान ११ः१६ बजे क्वाइन डेस्कमा प्रतिगोटा बिट्क्वाइनको भाउ ८१ हजार १२४ डलर ९३ सेन्ट कायम भएको छ ।
यो भनेको नेपाली रुपैयाँमा झन्डै १ करोड ९ लाख ७७ हजार रुपैयाँ हो । अघिल्लो दिन बजार बन्द हुँदाको तुलनामा १ दशमलव ८७ प्रतिशत बढी हो । यो वर्षको अहिलेसम्मको अवधिमा बिट्क्वाइनको भाउ ८० प्रतिशतले बढिसकेको छ ।
उता, अमेरिकाको प्रमुख शेयर परिसूचक एसएन्डपी ५०० २५ दशमलव ७ प्रतिशतले मात्रै बढेको छ । ट्रम्पको जित बिट्क्वाइन र अन्य डिजिटल मुद्राका लागि बुलिश संकेत भएको क्रिप्टो उद्योगको विश्वास छ । पूर्व राष्ट्रपति कार्यकालमा ट्रम्पले बिट्क्वाइनप्रति संदेह व्यक्त गरेको भएपनि हालैका महीना उनले क्रिप्टोकरेन्सीलाई समर्थन गरिरहेका छन् । क्रिप्टो उद्योग निकै जवान र हुर्किरहेको अनि आफूले यसमाथि विश्वास गर्ने सेप्टेम्बर १६ मा एउटा भाषणमा ट्रम्पले भनेका थिए ।
