ट्रम्पका हतियारधारी समर्थकद्वारा संसद भवनमै आक्रमण, एक महिलाको मृत्यु, वासिङ्टनमा १२ घन्टाका लागि कर्फ्यू

ट्रम्पका हतियारधारी समर्थकद्वारा संसद भवनमै आक्रमण, एक महिलाको मृत्यु, वासिङ्टनमा १२ घन्टाका लागि कर्फ्यू

अमेरिकी राष्ट्रपति डोनाल्ड ट्रम्पका हिंस्रक समर्थकहरुले अमेरिकी संसदमै हतियारहित आक्रमण गरेका छन् ।  उक्त क्रममा प्रहरीले चलाएको गोली लागेर एक जना महिलाको मृत्यु भएको छ । अमेरिकी कङ्ग्रेसमा सांसदहरूले जो बाइडनको जितको पुष्टि गर्न छलफल गरिरहेका बेला आक्रमण भएको हो । 

नोभेम्बरमा भएको निर्वाचनमा पराजीत ट्रम्पले हार अस्वीर गदै आफ्ना समर्थकहरुलाई उत्तेजित पार्दै हिंसात्मक प्रदर्शनका लागि हौस्याउँदै संसद भवनभित्रै पसेर उनीहरुले तोडफोड गरेका हुन् । भीड अनियन्त्रित हुँदै गएपछि उपराष्ट्रपति माइक पेन्स र सभामुख न्यान्सी पेलोसीलाई सुरक्षाकर्मीले सुरक्षित स्थानतर्फ लिएका थिए ।

परिस्थितिलाई नियन्त्रणमा लिन प्रहरीले चलाएको गोली लागेर एक जना महिलाको मृत्यु भएको न्यूयोर्क टाइम्सले जनाएको छ । ट्रम्प समर्थकको हिंसात्मक प्रदर्शनपछि राजधानी वासिंगटनमा कर्फ्यू लगाइएको छ भने संसद भवन सुरक्षाकर्मीले नियन्त्रणमा लिएका छन् । वासिङ्टनका मेयर मुरियल बोउसरले सहरमा १२ घन्टा लागि कर्फ्यू आदेश जारी गरेका हुन् ।

ट्रम्पले भने आफ्ना उग्र समर्थकको गतिविधिको बचाउ गर्दै आफूले जितेको चुनाव धाँधली गरेर खोस्दाको परिणाम भएको तर्क गरेका छन् । उग्र हतियारधारी ट्रम्प समर्थक जत्थाले अवरोध गरेपछि केही समय इलेक्टोरल मतलाई आधिकारिकता प्रदान गर्ने सदनको कार्यक्रमसमेत केही समय रोकिएको छ ।