फाइजर कम्पनीले उत्पादन गरेको कोरोना खोप ९० प्रतिशतसम्म प्रभावकारी, विश्वले कोरोनाबाट मुक्ति पाउने आशा

फाइजर कम्पनीले उत्पादन गरेको कोरोना खोप ९० प्रतिशतसम्म प्रभावकारी, विश्वले कोरोनाबाट मुक्ति पाउने आशा

औषधि उत्पादक कम्पनि फाइजरले कोरोनाविरुद्धको खोपको सफल परीक्षण गरेको दावी गरेको छ । सोमबार न्यूयोर्क टाइम्समा प्रकाशित एक रिपोर्टका अनुसार उक्त खोपको सुरुवाती परीक्षणमा कोभिड–१९ बाट बचाउन उक्त खोप ९० प्रतिशतसम्म सफल रहेको कम्पनीले जिकिर गरेको छ ।

जर्मनको औषधि कम्पनी बायोनटेकसँग मिलेर फाइजरले बनाएको उक्त खोपको सुरुवाती परीक्षणपछि गरिएको समीक्षापछि यस्तो निष्कर्ष निकालेको हो । यो खोप कोरोना भाइरस (कोभिड–१९) बाट बचाउन ९० प्रतिशतसम्म सफल रहेको दाबी गरिएको छ ।

कोभिड १९ प्रभावित स्वयम्सेवकहरुमाथि गरिएको परीक्षणपछि विज्ञहरुले प्राप्त सूचना विश्लेषण गर्दै निकालेको निष्कर्षका अनुसार खोप परीक्षणबाट कुनै गम्भीर नराम्रा परिमाणहरु देखा परेका छैनन् ।

फाइजरले खाद्य तथा औषधि प्रशासनसँग आपत्कालीन अनुमति माग्ने तयारी सुरु गरेको छ । यो वर्षको अन्त्यतिर खोपको पर्याप्त मात्रामा उत्पादन गर्दै १५ देखि २० मिलियन मानिसका लागि तयार बनाउने कम्पनीले दावी गरेको छ ।

फाइजर कम्पनिकी वरिष्ठ उपप्रमुख तथा खोप अनुसन्धान तथा विकासका प्रमुख काथ्रिन जानसेनले एक अन्तरवार्तामा भनेकी छिन्, ‘यो ऐतिहासिक पल हो । यो महामारी विध्वंशकारी अवस्था थियो, र हामीले अहिलेसम्म कसैले हासिल गर्न नसकेको उपलब्धि हासिल गरेका छौं । यो वर्षभित्र हामी कोभिड१९ विरुद्धको खोप लिएर आउनेछौं ।’